Word-Cloud zur Ideensammlung der Klasse P11g: «Wie lerne ich Wörter?»

Erstellt mit: www.wordle.net

Quelle: Lateinischer Wochenrückblick
der finnischen Radiostation YLE
http://yle.fi/radio1

De conventu climatico

Die Lunae (28.11.) Durbaniae, in urbe Africae Australis, conventus climaticus Nationum Unitarum inauguratus est. Participes imprimis id agere conantur, ut pactum de atmosphaera tuenda, de quo in urbe Kioto convenit, continuetur et ad novam pactionem ad omnes gentes pertinentem adeatur. Tractatus Kiotoensis, cui neque Sinae neque Civitates Americae Unitae subscripserunt, anno proxime futuro valere desinet. (Reijo Pitkäranta)

Breivik mentis non compos

Iudices Norvegi censuerunt Andream Behring Breivik, qui aestate proxime praeterita septuaginta septem homines Osloae interfecit, mentis non compotem fuisse. Verisimile igitur est eum in vincula non coniectum sed in aliquod valetudinarium psychiatricum inclusum iri. (Reijo Pitkäranta)

Neonazistae civium occisores

Animi Germanorum perturbati sunt compluribus homicidiis a neonazistis commissis, quibus saltem decem cives vitam amiserunt. Custodes publici tres homines deprehenderunt, quos commercium commune cum occisoribus habuisse creditur. Quam ob rem non desunt, qui reprehendant Germanos oblitos esse, quanto periculo partes dextrae extremae civitati essent. (Reijo Pitkäranta)

De percontatro Martiali

Magistratus Russi ab investigatione spatiali concesserunt sibi non contigisse, ut percontatrum cosmicum ad stellam Martem emitterent. Navis enim sideralis eorum in orbitam Terrae circumvolventem quidem pervenit, sed deinde machinamenta motoria, quorum erat cursum navigii ad Martem versus dirigere, non incitata sunt. Ex hoc vitio technico sequitur, ut missile illud re infecta aliquando in Terram decidat. (Reijo Pitkäranta)

Regio tutelaris naturae

Regimen Australiae decrevit regionem mari tuendo maximam prope oram Australiae septentrionalis condere. Quae area tutelaris Mare corallicum complectens circuitu tantum patet, ut superficiem Germaniae et Francogalliae in unum collatam aequiperet. Neque solum naturae Australiae proderit, sed etiam, ut speratur, ad rem viariam et quaestum piscatorum illis locis viventium nonnihil conferet. (Reijo Pitkäranta)

Finni pane vix vescuntur

Consumptio panis in Finnia his temporibus valde deminuta est. In causa, cur tam multi homines eo cibo tamquam sibi noxio vesci recusent, sunt hydrates carbonici, qui pane continentur. Pistores autem, ut clientes amissos recuperarent et novos quoque emptores sibi acquirerent, panificia novi generis ad mercatum ferre coeperunt. (Reijo Pitkäranta)

De cura laserica dentium

Cura dentium radio laserico multo facilior celeriorque redditur. Medici dentarii narrant curationem lasericam nullum dolorem aegrotis afferre, quae res efficiat, ut dentes etiam hominum odontophobia laborantium hodie sine anaesthesia locali curari possint. Apparatus laserici in Finnia adhuc rariores sunt quam in ceteris civitatibus Europaeis, sed usus eorum cito crebrescit. (Saara Honkanen)

Lateinischer Wochenrückblick
der finnischen Radiostation YLE
http://yle.fi/radio1

Tumultus in Aegypto orti

In urbe Cairo et aliis Aegypti partibus tumultus violenti orti sunt, quibus cives consilio militari terram regenti vehementissime adversantur. Neque reclamitantes contenti erant oratione, quam Mohammed Tantawi, dux illius consilii, die Martis (22.11.) coram populo habuit.
Contionabundus enim pollicitus est brevi in Aegypto et novam administrationem formatum et comitia praesidentialia institutum iri. Activistae autem flagitant, ut regimen militare nulla mora interposita imperium deponat et summa potestas rerum senatui e togatorum numero electo tradatur.
(Reijo Pitkäranta)

Edictum Nationum Unitarum

Violentiae et facinora contra iura humana facta, quae in Syria iam per octo menses continuantur, a Coetu Nationum Unitarum condemnata sunt. Idem ordo magistratibus Syriae imperavit, ne suis civibus iam vim adhiberent. Omnino centum viginti duae civitatates sociae huic edicto consenserunt, cum tredecim, in iis Irania, Corea Septentrionalis, Belorussia, tali clausulae adversarentur.
(Reijo Pitkäranta)

Comitia parlamentaria Hispaniae

In Hispania comitia parlamentaria facta sunt, quorum victoriam manifestam reportavit factio popularis dextra. Accepit enim sententiarum quadragenas quinas fere centesimas. Quae cum ita sint, novus princeps minister Hispaniae erit Mariano Rajoy, praeses partium victricarum. Socialistae autem, qui civitati multos annos praefuerunt, male vapulaverunt, quippe qui tantum undetricenas centesimas suffragiorum sibi conciliarent.
(Reijo Pitkäranta)

Neutrina luce velociora

Neutrina, corpuscula elementaria minutissima, luce velocius moveri videntur. Quod patuit ex experimentis, quae physici tribus annis iterum atque iterum modis operandi optimis et fide dignis usi fecerunt. Eventus a rerum peritis pro miraculo habetur, quia repugnat doctrinae ab Alberto Einstein propositae, qua contenditur in mundo nihil esse posse, quod lucem velocitate superet.
(Reijo Pitkäranta)

Urbes antiquae in Sahara

In imaginibus ope satellitum acceptis vestigia urbium antiquarum in desertis Saharae olim sitarum conspiciuntur. Existimantur haec loca archaeologica habitationes Garamantum esse, quem populum scriptores veteres in partibus Africae interioribus olim vixisse commemorant. Ex novis inventis conici potest cultum civilem huius gentis multo praestantiorem fuisse quam ex operibus Vergilii et Livii rem se habere putaveris.
(Reijo Pitkäranta)

Ordo verborum primarius

Investigatores Americani dicunt subiectum obiectumque in lingua primigenia ante verbum positum fuisse. Duo milia ducentae linguae, quarum evolutionem scrutati sunt, a prima origine hoc ordine utebantur, sed postea paene sine exceptione locum verbi mutaverunt. Huiusmodi lingua asseverant et maiores nostros in Africa Orientali abhinc quinquaginta milia annorum locutos esse.
(Antti Ijäs)

Lateinischer Wochenrückblick
der finnischen Radiostation YLE
http://yle.fi/radio1

Mario Monti primus minister

Novus princeps minister Italiae electus est Mario Monti, vir oeconomiae peritus duodeseptuaginta annos natus. Neque quisquam dubitat, quin munus eius Italiae administrandae maximi laboris futurum sit. Primum quidem ei tale subsidium regimini suo ab aliis partibus acquirendum est, ut structurae depravatae, quibus oeconomia Italiae aggravatur, penitus renovari possint. Nisi ei id efficere contigerit, magnum erit periculum, ne tota Italia aere alieno publico demergatur.
(Reijo Pitkäranta)

Quid Foedus Arabicum fecerit

Regimen Syriae in cives sibi reclamitantes stragibus cruentis effectis saevire perrexit. Quam ob rem Foedus Arabicum Syriam a societate sua interim demovere decrevit et exercitum eiusdem civitatis monuit, ut suos interficere desineret. Huc accedit, quod illa consociatio Syriae sanctiones oeconomicas et politicas imponendas esse censet et nationibus Foederis sociis suasit, ut legatos suos Damasco domum revocarent.
(Reijo Pitkäranta)

Medicus falsus in Finnia inventus

In Finnia duo medici falsi deprehensi sunt, qui per decem fere annos se medicos simulantes in variis sedibus sanitariis aegros curaverunt, quamvis nulla specimina academica ad artem pertinentia absolvissent. Quo nuntio perturbati cives iam solliciti inter se interrogant, num in valetudinariis Finniae alii quoque fraudatores pro medico se gerentes inveniantur.
(Reijo Pitkäranta)

Rhinoceros animal moribundum

‘Diceros bicornis’, species rhinocerotis Africana, qui vulgo ‘Rhinoceros niger’appellatur, iam omnino e natura emortuus est. Neque multum abest, quin etiam duo alia rhinocerotum genera eandem sortem subeant. Hoc patet ex Indice rubro sic dicto, quem Unio internationalis naturae tuendae edendum curavit. Ibi aestimatur, quinam sit status vivendi diversorum animalium et herbarum in mundo occurrentium.
(Reijo Pitkäranta)

De peste bubonica mediaevali

Genoma pestis bubonicae ab investigatoribus Germanis, Canadensibus Americanisque totum exploratum est e cadaveribus Londiniensium, qui aetate media hoc morbo perierant. Apparuit bacterium non inusitate letale fuisse, sed Europaeos illo tempore immunitatem tam debilem habuisse, ut nullo modo pesti resistere possent. Haec pestilentia ab Sinis in Europam diffusa tertiam vel dimidiam partem populi Europaei saeculo quarto decimo interfecit.
(Antti Ijäs)

Utilitas corpus exercendi

Qui exercitationi corporis laboriosae operam dant, melioris valetudinis sunt quam illi, qui se levius movere solent. Hoc patet ex investigatione academica in Universitate Helsinkiensi nuper divulgata. Si quis igitur currendo aut aliis huiusmodi generibus athleticis se dediderit, bonam patientiam laboris habebit neque tam saepe a sede operandi aberit quam alii.
(Reijo Pitkäranta)