Dr Hansjakobli und ds Babettli
hei mit em Chuchitaburettli
es Spieli zäme gschpilt zum Göisse
«He, he Frou Meier» het das gheisse.
Da isch zum Bischpiel zersch ds Babettli
druf gchlätteret uf ds Taburettli
und Hansjakobli, wo süsch zaaget,
Isch tifig tifig drunder gschnaaget.
Ganz lut het obehär ds Babettli
jitz gschtampfet uf das Taburettli,
bis dass dr Hansjakobli dopplet
So lut het undenufe topplet
und grüeft: «He, he Fou Meier machet
doch nid so Krach!», da hei sie glachet.
Und er isch obe gsi, äs unde,
und ds Spiel het disewäg stattgfunde.
Vo wäge grad so i däm Spiele,
wie zgrächtem Bischpiel git es vieli,
isch jede daderfür wird gchrampfet
gärn dä wo obenabe stampfet
Es isch nid jede wie ds Babettli
so harmlos uf sim Taburettli,
drum lueget, dass wie Hansjakobli
geng einen undenufe toppli.
I wett fasch säge, d′Wält wär freier,
wenn meh würd grüeft: «He, he Frou Meier!»
