Nuntii latini vom 20. Januar 2012

Quelle: Lateinischer Wochenrückblick
der finnischen Radiostation YLE
http://yle.fi/radio1

Naufragium periculosissimum

Idibus Ianuariis (13.1.), qui erat dies Veneris, ante oram Italiae calamitas maritima periculosissima accidit, cum navis circumvagans Italiana nomine Costa Concordia propter litus Tusciae ad scopulos allisa est. Quo facto latus eius male afflictum est et navis tantopere declinari coepit, ut non multum abesset, quin tota aquis submergeretur.
Vehebantur ea amplius tria milia viatorum cum mille fere nautis et ministris diversi generis. Terrore panico orto multi in mare desiliendo et in terram natando salutem petere conabantur. Saltem undecim insessores vitam amiserunt, et de sorte unius et viginti hominum parum constat. (Reijo Pitkäranta)

Margareta XL annos regnavit

Postridie Idus Ianuarias (14.1.) quadraginta anni acti erant, cum Margareta II, regina Daniae, ad potestatem pervenit. Ad hoc festum celebrandum die Dominico (15.1.) in urbem Hafniam magnus numerus hospitum summae dignitatis convenerunt, inter eos Tarja Halonen, praesidens Finniae. In caerimoniis erant prandium, officium divinum sollemne epulumque magnificentissimum in palatio Christianiburgensi apparatum. (Reijo Pitkäranta)

De poliomyeliti in India

Poliomyelitis ex India omnino evanuisse videtur, cum anno proximo nullus eius morbi casus ibidem inventus sit. Quam mutationem rerum eo pluris aestimaveris, si respicis numerum Indorum e poliomyeliti aegrotantium abhinc viginti annos centum quinquaginta milium in anno fuisse. Regimen autem Indiae vaccinationibus creberrimis apud populum institutis effecit, ut illi epidemiae tandem finis fieret. (Reijo Pitkäranta)

Nives in Europa ceciderunt

In Austria et Helvetia et aliis quoque mediae Europae civitatibus tanta nivium copia paucis diebus cecidit, ut multae regiones acervis nivalibus etiam unum metrum altis obruerentur. Itaque haud mirum est commeatum viarium in Austria passim interruptum esse. In Helvetia autem cives a magistratibus moniti sunt, ut labinas nivium caverent. (Reijo Pitkäranta)

Finnair volatus tutos habet

Finnair, societas aeria Finnica, se tutissimam ex omnibus societatibus Europaeis huius generis esse praebuit. In comparatione autem ad totum mundum pertinente secunda fuit, cum primum locum sibi pararet societas Iaponica nomine All Nippon Airways. Hoc apparet ex indice securitatis aeriae, quem rerum periti Germani variis statisticis observatis divulgaverunt. (Reijo Pitkäranta)

Kaisa Mäkäräinen victrix

Die Lunae (16.1.) redactores Finni a re athletica suffragio lato decreverunt, quis fuisset optimus vel optima athleta in Finnia anno bismillesimo undecimo (2011). Victoriam manifestam reportavit Kaisa Mäkäräinen, femina undetriginta annorum, quae anno proxime praeterito principatum mundanum in biathlo sibi conciliavit. (Reijo Pitkäranta)